Beim Duo Tropper / Schriefl kutt s Bescht vo der Steiermark und osm Allgäu zähmet, dia vermischlet gar alls vo ar Volksmusi, iber Thrash-Metal, Gstanzl, indischar Musik, am kubanische Mambo, am österreichische Schlager, Klassik und Avandgarde! D'Anna Tropper ka schier gar als spiele: Giege, Gitahr, Fliagelhorn und Klavier, ab und zua drommlet se o no! Und des was se seal id spiele ka, spielt bei eis der Hiasl: Drombeate, Fliagelhorn, Alphorn, Euphonium, Tuba und Akkordeon. Und singe dänd se beid, ob se grad amole d Gosch frei hand oder o id, und nacha machet se sich iber alls hea, was eahne grad guat dunckt.
Die viele Instrumenter standed id bloß umanand, dia wäret ständig gwässlet und danzed schier mitnand, so dass ba moit, bei jedem Stuck stoht sche mea a nuis Duo off der Bühne, was mea ebs komplett anders macht. Mankmol moisch, des Duo wär a Duell, oder sogar a Triole oder a Quartal, weil se beid oft so weigle d Instrumenter hin- und heawesslet, dass ba schier numm nachekutt. Des Duo hat gar koi Angst id vor de Heacha vo luschtige Stickla, aber deane wirds o id drimmslig, wänn se ganz diaf mea z Nacht ramiaßet ins danke Daal vo eernsthafta Ballada. Schriefl und Tropper sind wia Bergführer, bloß ohne Saufe und Schädelweh hinterhea, und se wisset jede Abkürzung und kennet alle Abhänge – oft amol dunckt oims Allgäu ganz näch bei Indien, der hoache Dachstoi luaget numm bis of des agleagene New York und der Kölner Dom isch glei nebs der Zugspitz. Des Duo miaßet uibre wealtoffene, nuigierige Ohre amole alose, a Inspiration, dass ba ebs nuis probiert und allad mit ar Freid weitermächelet.
Anna Tropper – Geige, Klavier, Gitarre, Flügelhorn, Percussion, Stimme
Matthias Schriefl – Trompete, Flügelhorn, Euphonium, Akkordeon, Alphorn, Tuba, Stimme